Átta BH-ingar kepptu í Noregi

3 hours ago

2 min read

Alþjóðlega badmintonmótið FZ Forza Norwegian International fór fram í Sandefjord í Noregi dagana 5.–8. nóvember. Alls tóku 14 leikmenn úr íslenska landsliðshópnum þátt í mótinu, þar af átta frá BH.

Mótið er hluti af Evrópumótaröðinni og gefur stig á heimslistann. Markmið okkar fólks með þátttökunni var ekki aðeins að vinna sig upp heimslistann heldur einnig að öðlast dýrmæta keppnisreynslu og mæta nýjum og fjölbreyttari andstæðingum en kostur gefst á hér heima.

Tvenndarleikur

Róbert Ingi Huldarsson og Una Hrund Örvar komust lengst BH-inganna í tvenndarleik. Þau unnu tvo leiki í undankeppninni og tryggðu sér sæti í aðalkeppninni. Þar mættu þau sterku pari í 32 liða úrslitum sem reyndist að lokum standa uppi sem sigurvegari mótsins.

Jón Sverrir Árnason og Hrafnhildur Edda Ingvarsdóttir léku spennandi þriggja lotu leik í undankeppninni en þurftu að játa sig sigruð eftir harða baráttu.

Katla Sól Arnarsdóttir lék með Eggerti Þór Eggertssyni frá TBR. Þau mættu sterku dönsku pari í undankeppninni og töpuðu í tveimur lotum.

Einliðaleikur kvenna

Hrafnhildur Edda Ingvarsdóttir keppti í einliðaleik kvenna þar sem hún mætti mjög sterkum leikmanni frá Indónesíu. Hrafnhildur tapaði í tveimur lotum en sú indónesíska gerði sér lítið fyrir og komst alla leið í úrslit mótsins þar sem hún hafnaði í 2. sæti.

Einliðaleikur karla

Fimm BH-ingar kepptu í undankeppni einliðaleiks karla.

Róbert Ingi Huldarsson, Jón Víðir Heiðarsson, Rúnar Gauti Kristjánsson og Jón Sverrir Árnason töpuðu allir sínum fyrstu leikjum í tveimur lotum.

Stefán Logi Friðriksson byrjaði hins vegar vel og sigraði grænlenskan andstæðing í fyrstu umferð. Í næsta leik mætti hann pólskum leikmanni og eftir spennandi þriggja lotu viðureign þurfti Stefán að játa sig sigraðan í oddalotu.

Tvíliðaleikur kvenna

Katla Sól Arnarsdóttir og Hrafnhildur Edda Ingvarsdóttir komust beint inn í aðalkeppnina í tvíliðaleik kvenna. Þar mættu þær sterku norsku pari og töpuðu í tveimur lotum.

Una Hrund Örvar lék með Örnu Karen Jóhannsdóttur frá TBR og komust þær einnig beint inn í aðalkeppnina. Þær mættu öflugu dönsku pari sem hafði betur í tveimur lotum. Danska parið komst síðan alla leið í úrslit mótsins og hafnaði í 2. sæti.

Tvíliðaleikur karla

Jón Víðir Heiðarsson og Stefán Logi Friðriksson mættu dönsku pari í fyrstu umferð undankeppninnar og töpuðu í tveimur lotum.

Jón Sverrir Árnason og Rúnar Gauti Kristjánsson mættu norsku pari í undankeppninni en þurftu einnig að sætta sig við tap.

Bestum árangri Íslendinganna á mótinu náðu TBR-ingarnir Kristófer Darri Finnsson og Davíð Bjarni Björnsson, sem komust alla leið í undanúrslit í tvíliðaleik karla.

Nánari úrslit mótsins má finna á vef Alþjóðabadmintonsambandsins (BWF).

Við erum stolt af okkar fólki sem heldur áfram að sækja sér dýrmæta reynslu á alþjóðlega keppnissviðinu. Slík mót eru mikilvægur liður í því að þróast sem badmintonleikmenn, takast á við nýjar áskoranir og öðlast reynslu gegn sterkum andstæðingum.

Við óskum öllum íslensku keppendunum til hamingju með frammistöðuna og hlökkum til að fylgjast með þeim áfram!